Kalender

Illustrasies is letterkundige towersleutels wat ‘n kind se verbeelding op wonderbaarlike wyse ontsluit.

Ons is kinderlik opgewonde om oud en jonk uit te nooi na: BAZOO SE WONDERWÊRELD soos geillustreer deur Fred Mouton.

Vanaf 13 Januarie tot 2 Maart 2024.

Kom stap saam deur Fynbosbuurt en geniet Fred se skerpsinnigheid en uitsonderlike vermoë om tot in die fynste detail kuns te skep.

Afdrukke van illustrasies sal beskikbaar wees om te koop.

Galery openingstye: Dinsdag tot Donderdag, 09h00 – 17h00 / Vrydag, 09h00 – 16h00 / Saterdag, 10h00 – 16h00.

Jannie se Leeskamer

Hierdie ruimte huisves Jannie Mouton se unieke boekversameling, wat nou toeganklik is vir die publiek.

Kunsgalery

In hierdie toonaangewende uitstalruimte word ʼn verskeidenheid Suid-Afrikaanse kunswerke van ouds, asook kontemporêre werke, vertoon.

De Eetkamer Restaurant

Sjef Marco Cardoso se moderne spyskaart bestaan uit ʼn kombinasie van geurige klein bordjies.
Bespreek by www.de-eetkamer.co.za

Skrywerskamer

Hierdie stimulerende ruimte bied aan skrywers die afsondering om met inspirasie te kan skep.

OOR OUDE LEESKAMER

Die Oude Leeskamer kultuur- en erfenissentrum is gesetel in ʼn historiese gebou op die hoek van Dorp- en Drostdystraat in Stellenbosch. Oor die geskiedenis heen het hierdie ruimte verskeie rolle in die Stellenbosse gemeenskap vertolk.

Sedert die totstandkoming van die gebou in 1815 het dit onder meer gedien as kantoor van die magistraat, anneks tot die Moederkerk en anneks tot die Teologiese kweekskool. Dit was ook al die tuiste van verskeie plaaslike leesklubs, en daarna van die destydse Union Debating Society. Meer onlangs was dit ʼn privaat woning, ʼn gastehuis, en is dit gebruik as die kantore van ʼn argiteksfirma.

Wat veral van belang is, is dat die Oude Leeskamer die gebou was waar die besluit geneem is rondom die daarstel van skole op die dorp. Die Universiteit Stellenbosch (US) het later uit dié besluit ontstaan.

In 2017 word die Oude Leeskamer die eiendom van die Jannie Mouton Stigting. Na ʼn merkwaardige restourasieproses is die gebou omskep in vyf spesiale ruimtes, naamlik Jannie se Leeskamer, ʼn kunsgalery, ʼn skrywerswoonstel, De Eetkamer Restaurant en die Jannie Mouton Stigting se kantore.

Die visie van die Oude Leeskamer is om ʼn toonaangewende erfenisbate te wees wat historiese waarde beskerm, maar terselfdertyd ʼn lewende ruimte is waar Suid-Afrika se unieke en diverse kuns en kultuur gevier word.

Ure

Dinsdag tot Donderdag, 09h00 – 17h00
Vrydag, 09h00 – 16h00
Saterdag, 10h00 – 16h00

Kontak

Tel: (021) 001-8829
E-pos: events@oudeleeskamer.org
Adres: Dorpstraat 182,
Stellenbosch, 7600

Reis Saam Met Ons