Vir ons tweede plaaslike filmaand bied ons aan Matilda en Matthys (2024), ’n hartroerende Suid-Afrikaanse romantiese drama onder regie van Bibi Slippers.

Matilda en Matthys volg die verhaal van ’n ambisieuse jong skrywer en ’n hiperlogiese tegnologie-entrepreneur wat besluit om voor te gee dat hulle op ’n reeks afsprake gaan – elk vir hul eie navorsingsdoeleindes: een vir ’n roman, die ander vir ’n afspraak-app-algoritme. Maar hulle ontdek gou dat selfs die briljantste breine nie die liefde kan uitoorlê nie.

Emma van Heyn (Twintig tone in ’n hangkas, Troukoors) en Adrian Steyn (Die onderonsie, Wyfie) vertolk die hoofrolle in hierdie romantiese komedie, saam met Bertha le Roux-Wahl (7de Laan), Pietie Beyers (Die onderonsie) en die komediant Mojak Lehoko.

Dit is die rolprentdebuut van skrywer-regisseur Bibi Slippers, ’n gepubliseerde digter en SAFTA-genomineerde draaiboekskrywer bekend vir haar werk aan Hotel. Die film word deur die vooraanstaande Danie Bester onder die Film Factory-vaandel vervaardig. Die afgelope 15 jaar het Bester 35 films vervaardig, met inbegrip van die lokettreffer Pad na jou hart, SAFTA-wenner Fiela se kind, en Suid-Afrika se amptelike Oscar-inskrywing, Toorbos.

Koste: R50 per persoon (springmielies en ’n koeldrank ingesluit)

Kliek hier om jou plek te bespreek.

Taal: Afrikaans